Բաժնետերեր

30.04.1970

Վահե Բադալյանը 1989 թվականից հոր` Ռոմիկ Բադալյանի, և եղբոր` Վիգեն Բադալյանի հետ միասին սկսել է զբաղվել ձեռնարկատիրական, այդ թվում առևտրամիջնորդական գործունեությամբ, որը ներառում է ֆինանսների, տեղեկատվական տեխնոլոգիաների, գյուղատնտեսության և այլ ոլորտներ։

1992 թվականին կառուցել է առաջին մասնավոր բենզալցակայանը Հայաստանում։ Այնուհետև կառուցել է ևս 3 բենզալցակայաններ և հանդիսացել վառելիք ներմուծող խոշոր ընկերություններից մեկի հիմնադիր/սեփականատեր։ Այս գործունեությունը ծավալվել է շուրջ 10 տարի։

1994 թվականին հիմնադրել է «Ֆասթ Կրեդիտ» ՍՊԸ-ն։ 2011 թվականին ընկերությունը վերակազմավորվել է՝ դառնալով վարկային կազմակերպություն, իսկ 2022 թվականի նոյեմբերի 9-ին ՀՀ Կենտրոնական բանկից ստացել է բանկային գործունեության լիցենզիա և վերանվանվել «Ֆասթ Բանկ» ՓԲԸ։

Վահե Բադալյանը հիմնել է նաև «Բադալյան եղբայրներ» ՍՊԸ-ն։ 2003 թվականից սկսած «Բադալյան եղբայրներ» ընկերությունը նախաձեռնել է ռեստորանային, հյուրանոցային ու գյուղատնտեսական նախագծեր (օր.՝ Կովկաս ռեստորանային համալիր, Կովկաս հյուրանոցային համալիր, Կովկաս Ագրո և այլն)։

2011 թվականին հիմնել է BetConstruct ընկերությունը, որը Հայաստանում տեխնոլոգիական ոլորտի առաջատարներից է և ավելի քան տասնամյակ տրամադրում է նորարարական տեխնոլոգիական լուծումներ՝ ունենալով մասնաճյուղեր տասնյակ երկրներում՝ կիրառելով ժամանակակից տեխնոլոգիաներ, այդ թվում՝ AI և ML։

2016 թվականին Մեծ Բրիտանիայում հիմնադրել է «Ֆասթ Կրեդիտ» վարկային ընկերությունը, որը շուկայում պահպանում է իր մրցունակ դիրքերը և ունի արդեն իսկ 14 մասնաճյուղ։ 2018 թվականին հիմնադրել է «Ֆասթ Շիֆթ» ընկերությունը, որը մատուցում է վճարահաշվարկային ծառայություններ՝ 24/7 արագ և անվտանգ դրամական փոխանցումների հնարավորությամբ, ունի ավելի քան 1000 վճարային տերմինալ և առաջարկում է շուրջ 400 վճարման եղանակ մեկ ինտեգրված հարթակում։

2020 թվականին Մեծ Բրիտանիայում բացել է «Fjewellery» խանութների ցանցը: Ընկերությունը ներգրավված է ոսկու արտադրության, վաճառքի և արտահանման գործում։ Վահե Բադալյանը համահիմնադիր է մի շարք տեխնոլոգիական ընկերությունների՝ Soft Construct, FinConstruct, BetConstruct, FeedConstruct, PandaMR և այլն, որոնք առաջարկում են ծրագրային լուծումներ, առցանց հարթակներ և դիզայնի գործիքներ Հայաստանում և արտերկրում։

Վահե Բադալյանի հիմնադրած ընկերությունները գործում են Հայաստանում, Ֆրանսիայում, Մեծ Բրիտանիայում, Գերմանիայում, Ռումինիայում, Դանիայում, Շվեդիայում, Բրազիլիայում և այլ երկրներում։ Բիզնես գործունեության հիմքում սոցիալական պատասխանատվությունն է՝ տնտեսական, բնապահպանական, կրթական ու մշակութային արժեքների զարգացումը։

Վահե Բադալյանը նաև հիմնադրել է «Վահագն Բադալյան» բարեգործական հիմնադրամը և մշտապես ներգրավված է սոցիալական և հայրենասիրական նախագծերում՝ աջակցելով կրթական և մշակութային կառույցներին, սահմանամերձ դպրոցների վերանորոգմանը, սոցիալապես անապահով ընտանիքներին ու ստարտափներին։

Ամուսնացած է, ունի երկու որդի և մեկ դուստր։